عمرو أديب: قلبي يقطر دما على خسارة الأهلي أمام بيراميدز

علّق الإعلامي عمرو أديب على خسارة الأهلي أمام بيراميدز، معبرًا عن رؤيته بشكل صريح تجاه مستوى الفريق، وتطور المنافسة على لقب الدوري المصري هذا الموسم.

وقال أديب، خلال برنامجه «الحكاية» عبر قناة «MBC مصر»: «قلبي يقطر دمًا، بالتلاتة.. هتقول لي على إيه يا عمرو؟ أقولك إن انبساطي إن الأهلي اتغلب أكبر بكتير من خوفي إن بيراميدز ياخد الدوري».

وأضاف: «خليكوا حقانيين، هو الأهلي لعب كورة السنة دي؟ يعني الأهلي إيه؟ الأهلي عمل أي حاجة؟ بيراميدز ده فريق ليه خطوط أول وتاني وتالت وإمكانياته، وإحنا غلبناه».

وتابع: «بس إن شاء الله، بعون الله، الأهلي لن يأخذ الدوري، وبيراميدز لن يأخذ الدوري، والزمالك هو إن شاء الله اللي هياخد الدوري السنة دي».

وأكمل: «فقلبي يقطر دمًا إن إمبراطورية الأهلي بدأت في الانتهاء، أنا بقول لحضراتكم إن الزمن خلاص، الدنيا ما هي عشريات، العشرية دي إن شاء الله زملكاوية، العشرية اللي فاتت كانت أهلاوية، والعشرية دي زملكاوية بيراميدزية، فيه حالة كروية في مصر، والأشياء بتتغير».

واستطرد: «وتسأل ليه يا صديقي الصغير في السن تتحدث عن إمكانيات الأهلي ولعيبته؟ الفرقة اللي فيها زيزو وإمام عاشور وتريزيجيه إزاي ما بتكسبش؟ أنتوا عارفين التلاتة دول بكام؟ التلاتة دول تمنهم تمن اللعيبة اللي موجودة في الزمالك كله.. كله!».

وتابع: «الزمالك عامل موسم كويس، والزمالك بإمكانيات قليلة عامل موسم عظيم.. وبيراميدز بإمكانيات رهيبة، في الصف الأول والصف التاني والصف التالت، والناس بتلبس هدوم جاية من مش عارف فين، والفتلة بتاعتها عاملة إزاي، والأحذية بتاعتهم موزونة على مقياس ريختر، وكل ده وفي النهاية ناس عندها إمكانيات».

واختتم: «وأرجو أن تكون هناك مواجهة مع الذات، مواجهة مع مجلس إدارة الأهلي، مواجهة مع جمهور النادي الأهلي، إن النادي الأهلي في أسوأ حالاته.. هو إحنا يا جماعة ليه الزمالك يوم ما بيبقى سيئ وبيبقى في أسوأ حالاته ومجلس الإدارة متفسخ ومش عارف إيه، يقعدوا يقولوا لنا الزمالك تعبان، ده أنتوا لعيبة مش عارف إيه، ما عندكمش بتاع، ما معكمش فلوس تسافروا، فيه خناقات».