عبلة سلامة تهاجم نهاية مسلسل الست موناليزا: دخلنا في إجراءات قضائية جديدة!

انتقدت الإعلامية عبلة سلامة، ما وصفته بأخطاء درامية وقانونية في الحلقة الأخيرة من مسلسل "الست موناليزا"، مشيرة إلى وجود ما اعتبرته "أحداث غير منطقية" في مشاهد المحاكمة.

وكتبت عبلة سلامة، عبر حسابها بموقع فيسبوك: "بصراحة في آخر حلقة من مسلسل "الست موناليزا" حصلت حاجة درامية قانونية نيابية محاكمية غريبة شوية".

وتابعت: "النيابة طول الجلسة واقفة تدافع عن موناليزا، طيب لحظة بس، النيابة أصلًا هي الجهة اللي بتوجه الاتهام، يعني عادة بتتهم الناس اللي واقفة في القفص مش بتدافع عنهم، طيب لما النيابة في خطبة كلها دفاع عن الست، فين التهمة ومين؟ وليه؟".

وأضافت: "حاجة تانية، كلهم لابسين أبيض، اللبس الأبيض ده بيبقى للمحبوسين احتياطي لما يدخلوا السجن على ذمة التحقيق، إنما دول أصلًا ما اتحبسوش ولا صدر ضدهم حكم".

واستطردت: "أيوه المتهم لازم يحضر الجلسة في القفص، بس القفص واللبس الأبيض مع بعض كده من غير حبس احتياطي، يبقى احنا دخلنا في نوع جديد من الإجراءات القضائية، وأخيرًا نفسي أشوف محاكمة القاضي بيحكم فيها على طول كده".

وقالت: "يا جماعة التفاصيل الصغيرة دي مهمة في الدراما، طب نستشير قانوني طيب، خلونا ناخد بالنا شوية".

وختمت كلامها: "ملحوظة، علشان ما تدخلش لجان تبع أي حد، أنا تابعت المسلسل وعاجب كل الناس، وناجح وبتشوفه، ولا أقصد أبدًا الإساءة لأي حد، أنا ماليش في الجو ده".

مسلسل "الست موناليزا" تأليف محمد سيد بشير، وإخراج محمد علي، وبطولة مي عمر وأحمد مجدي، وشيماء سيف.