بعد دهسه شخص على الدائري.. عصام صاصا: أنا هنزل اشتغل لأن عندي عقود والتزامات وفرقة في رقبتي

أعلن مطرب المهرجانات عصام صاصا، عن عودته لنشاطه الفني بعد توقف دام لعدة أسابيع، بعدما دهس شخصا على الطريق الدائري؛ ما أدى إلى وفاة الشاب في الحال.

وكتب "صاصا"، عبر صفحته الرسمية على "فيسبوك"، قائلا: "ربنا وحده يعلم أنا بكتب الكلام ده وأنا عامل إزاى وفي إيه، أنا بقالي أكتر من شهر قاعد من غير شغل ومعنديش أي حاجة أعملها غير إني قاعد وما باليد حيلة، ومستني قضاء ربنا سبحانه وتعالي، ومحدش هيفهم أو هيحس بالموضوع غيرى".

وأضاف: "أنا مطلعتش اتكلمت وعدت وزدت في الموضوع كتير ومحدش شافني حتى بفيديو قولت أي كلمة خالص، لكن أنا عندي شغلي وعندي عقود والتزامات يا إما أعملها وأخلصها يا إما هدخل في قصة تانية أنا مش قدها وشرط جزائي".

وأضاف: "أنا هنزل شغلي وهشتغل لأني مش بإيدي أي حاجة غير إني أعمل كده، أنا عندي أمي وعندي أخويا وعندي مراتي وابني وفرقة فيها أكتر من 35 شخصا في رقبتي أنا شاب لسه ببدأ حياتي ولسه بقول يارب".

وتابع: "مصاريف البيت والأقساط والحاجات دي كلها اللي انتو متعرفوش عنها حاجة مين اللي هيدفعها أنا طالع اتكلم لأن ما باليد حيلة غير إنكم لازم تفهموا إن كل اللي بتسمعوه مش صح الفلوس والقصور والعربيات كل ده مش صح وحال الناس اللي شاغلين معايا كل دول حالهم واقف بسببي أنا كل دول ليهم بيوت وعيال ودنيا تانية خالص".

وواصل: "أنا عارف ومتأكد إن ربنا مش هيورينا الشر ومش هيوريني أي حاجة وحشة ده ابتلاء من عند ربنا سبحانه وتعالي وأنا راضي بكل حاجة ومش هقول غير الحمد لله على كل شئ والحمد لله واللي ربنا كاتبهولي هشوفوا، سوا خير أو شر".

واختتم: "محتاج من كل الناس اللي بتحبني تدعيلي من قلبها بجد، أنا عمري ما كنت شخص مؤذي وعمري ما كنت شخص وحش مع حد، ربنا كبير، وحشتوني أوي يا أحلى جمهور في الدنيا".