طالب يفقع عين صديقه بعد وصلة هزار بالجيزة

تباشر نيابة الطفل بالجيزة التحقيقات مع صبي شوه وجه صديقه وتسبب في فقع عينه بعد وصلة هزار بالجيزة، وطلبت النيابة تحريات المباحث حول الواقعة.

واستمعت النيابة إلى اعترافات المتهم وقال "ع" طالب 14 عاما: "اللي حصل إن أنا والمجني عليه أصحاب من ثلاث سنوات وكنا متفقين نتقابل ونروح السايبر علشان نلعب ومفيش بنا أي خلافات وكنا بنهزر مع بعض، وأنا أخدت منه خمسة جنيهات وهو أخد مني الكاب بتاعى، ولما خلصت لعب الجيم خرجت وراه وقلت له هات الكاب، فمرديش، فقعدنا نشده من بعض وبعد كده الهزار قلب بجد".

وتابع: "قعدنا نشد الكاب من بعض لحد مأنا أخدته منه، راح هو مسك إزازة وخبطني بيها في مناخيري، وأنا نزفت منها روحت أنا لقيت إزازة على الأرض وكانت مكسورة وخبطه بيها في دماغه ضربة واحدة فلقيت وشه كله دم".

واستطرد: "رحت جريت على البيت وبلغت أهلي باللي حصل، وبعدين هما راحوا علشان يشوفوا القصة وبعدها بنص ساعة لقيت قوة أمنية من مباحث العمرانية جت خدتني من البيت وهو ده كل اللي حصل، بس أنا مكنش قصدي أعمل كل ده، أنا ضربته ضربة وجت في وشه ومعترف إن أنا غلطان".

وتبين من التحريات أن وصلة هزار بين المتهم والمجني عليه تحولت إلى تشابك بالأيدى، وعلى إثرها تعدى المتهم على صديقى باستخدام "إزازة" في منطقة الوجه، وتم نقله إلى المستشفى لتلقى العلاج.

تلقى قسم شرطة العمرانية، إخطارا من أحد المستشفيات بوصول طالب ومقيم بمنطقة العمرانية مصابا بجرح قطعى ونافذ بقرنية العين وخروج عدسة العين ادعاء تعدى.

وانتقل ضباط مباحث القسم إلى مكان البلاغ، وبالفحص تبين حدوث مشادة كلامية بينهما تطورت إلى مشاجرة، تم ضبط المتهم، وبمواجهته اعترف بارتكاب الواقعة وحرر محضر بالواقعة وجارى العرض على النيابة العامة لمباشرة التحقيقات.