بسبب 150 ألف جنيه.. مهاجم الزمالك يتهم إدارة النادي بتدميره

كشف يوسف حسن مهاجم الفريق الأول لكرة القدم بنادي الزمالك، أسباب غيابه عن المشاركة في المباريات مع الفريق خلال الفترة الماضية.

وكتب يوسف حسن، عبر صفحته على «فيس بوك»: «أنا بس هتكلم كلمتين والواحد ساكت متكلمتش من ساعة ما اتصابت.. أنا ولاحد بيسأل فيا ولا حد بيطمن عليا بدون ذكر اسمى، أنا مقصرتش مع حد ولا عمري حد شاف مني حاجة وحشة».

وأوضح: «أولًا أنا اتصابت في ماتش المقاولون العرب في الكاحل.. تمام، اتعالجت يومين وبعدين روحت المنتخب الشباب اتخبط فيها تاني، والإصابه تشخيصها إني عندي قرحة في الكاحل محتاجة ليزر وكل ماكلم حد يقولي النادي مفهوش فلوس، أنا بقالي خمس شهور قاعد في البيت مفيش حد عارف يعملي عملية بـ 150 ألف جنيه لدرجة إني قولت عاوز فلوسي وأنا هعملها على حسابي».

وأضاف: «تاني مرة أقولها حسبي الله ونعم الوكيل في اللي قال مزمنة، إنت كده بتدمرني أنا معملتش حاجة وحشة، إللي قال كده يثبت إنها مزمنة وأنا هوريله التقرير والإشاعات، نفسي أفهم ليه بيحصل كده، أنا مقصرتش بنقطة عرق، وأنا بلعب مع نادي الزمالك لعبت خمس ماتشات كسبنا الخمسة الحمدلله يعني مقصرتش بأي حاجة».

وأتم: «عامة أنا في انتظار حد مسؤول في النادي يكلمني، وهعمل العملية وهرجع أحسن من الأول بإذن الله، وأنا بحب جمهور الزمالك من قلبي فعلا شكرًا».