إكرامي عن عودة رمضان صبحي للأهلي: «مالوش فيديوهات سب لرموز النادي»

تحدث شريف إكرامي، حارس مرمى الفريق الأول لكرة القدم بنادي بيراميدز، عن إمكانية عودة رمضان صبحي، جناح الفريق السماوي للنادي الأهلي، خلال الفترة المقبلة.

وقال شريف إكرامي، خلال حواره ببرنامج «الهدف»، المذاع عبر فضائية «أون تايم سبورتس2»: «كمنظومة مصرية، إيه مرجعيتنا في الحكم على الصح والغلط، هل هو الاحتراف ولا قيم ومبادئ كل نادي ولا المزاج العام، يعني لو المزاج العام يقبل يبقى صح ولو لا يقبل يبقى غلط».

وأضاف: «كل الأراء اللي سمعتها سواء المؤيدين لعودة رمضان صبحي أو المعارضين، الاتنين مفيهمش إقناع بالنسبة لي لأن معندهمش أسباب منطقية».

وتابع: «المؤيدين قالوا، رمضان يقدم اعتذار ويرجع الأهلي إحنا في إحتراف، ولكن السؤال يعتذر عن إيه؟ هو رمضان غلط في حق الأهلي».

وأكمل: «ما هو حق الأهلي أو أي نادي، أول حاجة إن احترم العقد واحترم رموزك وتاريخك وكيانك ومسؤوليك، مطلعش أهاجم حد ولا ادخل في خصومة مع النادي إعلامية أو قضائية».

وواصل: «هل رمضان صبحي، أخطأ في حق الأهلي كي يعتذر؟ لا، هل اختلاف رغبتي مع رغبة المسؤول ده يعتبر غلط في حق النادي؟ بالتأكيد لا، لأن النادي بيدي نفسه الحق أنه يتفاوض مع لاعب وقبل التوقيع يتراجع ووقتها لا يعتذر للاعب، رمضان مفيش حاجة يعتذر عليها».

وزاد: «بالنسبة للمعارضين اللي بيقول قيم ومبادئ الأهلي لا تسمح، رمضان صبحي، مجاش جنب المبادئ ومغلطش في مبادئ النادي ولا القيم، رمضان لا عمره اتخانق مع مسؤولين وأهانهم وتحدث بطريقة غير جيدة»، مضيفًا: «رمضان مالوش فيديوها مصورة مع الجماهير المنافسة وهو يسب النادي الأهلي وجمهوره ومالوش فيديوهات مصورة يسب رموز النادي ويشتمهم ويتطاول عليهم، ولا أقصد إمام عاشور، أنا اتحدث بصفة عامة».

واسترسل: «تقول رمضان صبحي، مش هيرجع الأهلي بسبب غضب الجمهور لاختياره الانتقال لنادي بيراميدز أوافق على هذا المبرر»، مضيفًا: «هتقول رمضان، مش هينفع يرجع الأهلي لأن كبرياء المسؤولين لن يسمح لهم بأن يفتحوا التفاوض معه مرة أخرى بسبب اختياره الانتقال لنادي بيراميدز أوافق هذا المبرر».

وأتم: «إنما تقولي قيم ومبادئ النادي لا تسمح، أنت كدة بتناقض نفسك وبتكيل بمكيالين، لأن مينفعش إن الأمور لما تكون في صالحي يبقى المراجعية احتراف بس وأتغاضى عن أي حاجة تانية، ونادي قيم ومبادئ لما يبقى عكس رغبتي».