أجواء مليئة بالجثث والدماء.. محمد صلاح العزب يكشف كواليس مسلسل سفاح الجيزة

كشف المؤلف محمد صلاح العزب، كواليس كتابة مسلسل "سفاح الجيزة"، الذي يعرض حصريا على منصة شاهد.

وكتب عزب عبر حسابه على فيسبوك: "بعد عرض نص حلقات المسلسل، وبصفتي بحب الكواليس، فأنا حابب أتكلم شوية الكواليس المرهقة والممتعة لكتابة مسلسل سفاح الجيزة، وحابب طبعا أشكر عماد مطر وإنجي أبو السعود، شباب ورشة الكتابة الشطار، اللي لولا دأبهم ومجهودهم المسلسل عمره ما كان هيطلع بالشكل ده".

وتابع: "علاقتي بالمسلسل بدأت من أحمد فهمي، اللي عرفني بالمنتج طارق نصر، واتفقنا على كتابة مسلسل سفاح الجيزة لمنصة شاهد، وأحمد قالي طارق نصر معاه اتنين شباب اقعد معاهم وشوف دماغهم، ولو تمام كمل بيهم، مش تمام نشوف الدنيا ممكن تمشي إزاي".

وأضاف: "مع القعدات الأولى حسيت إننا هنبدأ من يعني إيه سيناريو أصلا، وطارق قالي أنا عاوزك تقيم الشباب وتقرر، بس أنا كنت حبيتهم من القعدات السريعة، وقررت إننا هنكمل سوا، بأي شكل".

وأكمل: "بدأنا الرحلة، اللي كانت أول شهر تقريبا عبارة عن كورس سيناريو مش ورشة كتابة، وقعدنا شغالين على المسلسل فترة طويلة جدا، وقعدنا شهور بنتقابل في مكتبي في الدقي ١٠ و١٢ ساعة، وفي مكتب فهمي في الشيخ زايد، وعند أحمد علاء في وسط الناموس، اللي طوله ٢ متر وفي الكافيهات وفي الحر والبرد والربيع والخريف، وفي المرات اللي عماد وإنجي كانوا بيشتغلوا لوحدهم فيها لازم يبعتوا لي صور إنهم شغالين".

وأردف: "حقكم عليا، هي كانت مرحلة صعبة، بس الحمد لله، أكيد انتوا دلوقتي حابين إن ده حصل بالشكل ده، وشايفين النتيجة، والحمد لله.. الدنيا اتطورت بسرعة كبيرة، وعماد بالذات ركب الموضوع بسرعة ولما اتزنقت مرة في الوقت في مسلسل رمضان ضميته هو وكرم بكر عشان يكملوا معايا".

واختتم منشوره: "وهكذا تمت كتابة سفاح الجيزة في أجواء مليئة بالجثث والدماء والرومانسية.. أنا مبسوط جدا بعماد وإنجي كمان عشان هم بني آدمين مميزين، عماد دءوب ومجتهد ومش بتاع مشاكل وبينقذ قطط وكلاب، يبقى أكيد شخص طيب، وإنجي مخلصة وبتعترف بالجميل لأي حد علمها حاجة، ومجتهدة وبتسعى عشان توصل لهدفها من غير ما تعتمد على وسايط ولا علاقات زى ما بنات كتير بتعمل علشان توصل لشهرة سواء فى كتابة أو تمثيل.. شكرا يا عمدة.. شكرا يا إنجي.. شرفتونا".

وكان مسلسل "سفاح الجيزة" تصدر التريند منذ عرض حلقاته الأولى، وهو مستوحى من قصة حقيقية، وتدور أحداثه في 8 حلقات عن جرائم سفاح الجيزة، الذي حكم عليه بالإعدام بعد إحداثه ضجة عام 2021.

"سفاح الجيزة" بطولة أحمد فهمي، وركين سعد، وباسم سمرة، وأشرف على كتابته محمد صلاح العزب، وسيناريو وحوار إنجي أبو السعود، وإخراج هادي الباجوري.