بقلم...سامي عبد المنصف

السنيورة والغلبان

أنا حبيتك من غير ما اعرف إني بحبك

من غير حتى ما افكر فيكي

وانتي بعيدة زي النجمة . . زي البدر

نورك يملا عليّ الدنيا

لكن بيني وبينك دهر

***

لما باشوف الفرحة ف عينك يرقص كل الكون عينيّة

واسمع صوتك لو مش ليّة قلبي يزلزل كل كياني

وكل الدنيا تبقى ف ثانية ملك إيديّة

***

وآه لو شفت دموع ف عيونك

نازلة بتروي ورد خدودك

باشعر إن الدنيا ما تسوى

غير منديل السعد نصيبه

راح يتهنى ويلمس خدك

أنا وصيته يقول لعيونك . . إني بحبك

***

من غير ما اعرف إني بحبك

من غير حتى ما افكر فيكي

وانتي بعيدة زي النجمة . . زي البدر

نورك يملا عليّ الدنيا

لكن بيني وبينك دهر

***

مش باتمنى أكون لِك عاشق

ولا باتمنى تكون حبيبة

ولا باتمنى أكون لك فكرة

تخطر حتى ف بالك مرّة

ولا باتمنى ف قلبك ذرّة

أسكن فيها ان شالله ثواني

واعاود تاني

أمني عينيّة بسحر عينيكي

وادور حواليكي

كوكب حاير وانتي الشمس

بيهمس همس

***

أنا حبيتك من غير ما اعرف إني بحبك

من غير حتى ما افكر فيكي

وانتي بعيدة زي النجمة . . زي البدر

نورك يملا عليّ الدنيا

لكن بيني وبينك دهر

***

كل منايّ إني أحبك ليل ونهار

حبك يملا عليّ الدار

لحن الكلمة ف صوتك آية

يكون إلهامي لألف حكاية

وألف قصيدة ف ألف ديوان

عن سنيورة

ساكنة ف قلب راجل غلبان